1936 թվականի դեկտեմբերի 12-ին հայկական առաջին հնչյունային ֆիլմի՝ «Պեպո»-ի ցուցադրումով տեղի ունեցավ «Մոսկվա» կինոթատրոնի բացումը: Կինոթատրոնի շենքը լիովին համապատասխանում է 20-րդ դարի սկզբի համաշխարհային ճարտարապետության սկզբունքներին ու ոճին։ Այժմ կինոթատրոնը ունի 4 դահլիճ, որոնք հագեցած են ժամանակակից տեխնիկական միջոցներով: Կինոթատրոնը համագործակցում է մի շարք հայտնի ընկերությունների հետ՝ «The Walt Disney Company»,«Sony Pictures», «Paramount Pictures», «20th Century Fox», «DreamWorks», «Universal Studios», «Warner Bros»՝ ֆիլմացանկում ներառելով համաշխարհային լավագույն ֆիլմերը: Ֆիլմացանկը հաճախ է փոփոխվում. յուրաքանչյուր հինգշաբթի տեղի է ունենում արտասահմանյան որևէ ֆիլմի պրեմիերա,երբեմն՝ մեկի փոխարեն միանգամից մի քանի: Արտասահմանյան ֆիլմերի հետ մեկտեղ կինոթատրոնում ցուցադրվում են նաև հայկական արտադրության ֆիլմեր, որոնք վերջին տարիներին բավականին շատացել են հանդիսատեսի՝ տեղական ժապավենների նկատմամբ հետաքրքրություն աճին համընթաց: Կինոցուցադրություններին զուգահեռ կինոթատրոնում կազմակերպվում են զանազան միջոցառումներ և կինոփառատոններ, կինոթատրոնի սպասասրահում իրականացվում են տարաբնույթ ցուցահանդեսներ:
Պահպանելով տասնամյակների պատմությունն ու գեղեցիկ ավանդույթները՝ կինոթատրոնը մշտապես գտնվում է առաջխաղացման փուլում՝ պատրաստ լինելով ժամանակակից մարտահրավերներին: